Sun, 05 Apr 2020

Cebuano News: PSA manawat tig-abag sa DepED alang CPH 2020

Philippine Information Agency
28 Feb 2020, 22:38 GMT+10

KAHIGAYONAN SA TRABAHO. Matud ni PSA Registry Officer Federico Aparri, ang Census of Population and Housing (CPH) manginahanglan sa dugang enumerators nga moabag sa DepED alang sa us aka buwan nga census sa Mayo ngadto sa Hunyo 2020. Uban ni Aparri si PSA Bohol Sattistician Jessamyne Anne Alcazaren ug Glenda Wahing. Alang sa dugang kasayuran, bisitaha ang PSA Bohol sa 2nd floor sa Galeria Luisa. (rahc/PIA-7/Bohol)

TAGBILARAN CITY, Bohol, Feb. 27 (PIA) -- Nanginahanglan na usab ang Philippine Statistics Authority (PSA) og mga enumerators nga motrabaho isip katimbang sa mga magtutudlo nga maoy manguna sa pagpatuman sa Census of Population and Housing (CPH 2020) sa Mayo ngadto sa Hunyo pohon niining tuig.

Subay sa Memorandum of Agreement (MOA) nga gilagdaan sa PSA ug sa Department of Education (DEPED), mga magtutudlo sa mga eskwelahan ang manguna sa pagpalakaw sa pencil and paper census nga nagsugod sa Mayo 4 ngadto na sa Hunyo 1, 2020.

Apan, matud ni PSA Registry Officer Federico Aparri, bisan pa kon mga maestro ang unang prayoridad sa motrabaho sa census, may mga posisyon pa nga mahimong trabahoon sa dili maestra.

Kini mao ang posisyon sa 48 ka Assistant Census Supervisors ug lain nga 48 ka headquarter clerks.

Didto sa Kapihan sa PIA sa mi-aging semana, gipasabut usab sa mga taga PSA pinangulohan ni Provincial Statistician Jessamyn Anne Alcazaren nga ang CPH 2020, nagtumong nga makahatag sa mga policy planner ug nga tighimo sa balaod sa updated nga kadaghanon sa populasyon ug kabalayan alang sa katilingbanon, ekonomikanhon nga palnong pangkaugmaran.

Matud sa PSA, ang CPH 2020 dako og tabang sa kagamhanan, sa mga negosyante, industriya ug mamumuhunan, lakip na sa mga ekswelahan, aron matumbok ang mga lugar nga katukoran sa negosyo ug mga tunghaan.

Kini usab maoy bahehan sa paghimo og banabana sa mga tinubdan sa pagkaon nga makonsumo sa usa ka lugar, sa kadaghanon sa pwersa sa mga mamumuo, makapasugod sa mga pagtuon kabahin sa populasyon ug mga pagtuon sa kadaghanon sa populasyon ug kalapdon niini, agi og unod unya sa mga population projections.

Sa census pananglit, makit-an kon may panginahanglan na ba nga maghimo og sipak nga lungsod o distrito, political units ug susama nga mga pagpasayun sa pagpadagayday sa serbisyo sa kagamhanan, dugang sa PSA.

Alang sa mga pwesto nga mahimong sudlan sa mga dili sakop sa DepED, sama pananglit sa 48 ka Assistant Census Supervisors, ang aplikante kinahanglan nga gradwado sa kolehiyo, residente sa lugar nga himoan sa census, may igo nga kasinatian isip supervisor sa una na nga mga census, dili moalaps sa 55 anyos ang edad, maayo og agi sa sinuwatan nga kinamot ug may maayong kinaiya sa pagpanarbaho sama sa pagtrabaho bisan wala na sa oras aron lamang mahuman ang gimbuhaton.

Sa laing bahin, alang sa 48 ka Headquarters Clerks, halos parehas ang ilang gikinahanglan gawas lamang sa igo nga kasinati-an isip supervisor sa census ug may kasinati-an alang sa paggamit sa teknolohiya pagpasulod sa atus nga makuha gikan sa field.

Alangsa dugang mga kasayuran, pakisayud pinaagi sa pagbisita sa PSA Bohol, naa sa ikaduha nga andana sa Galleria Luisa, Gallares Street niining syudad sa Tagbilaran. (rahc/PIA-7/Bohol)

More United Kingdom News

Access More

Sign up for United Kingdom News

a daily newsletter full of things to discuss over drinks.and the great thing is that it's on the house!