Sun, 17 Jan 2021

Cebuano News: Bisan negatibo, importante ang 'timing' pagpaswab test

Philippine Information Agency
26 Nov 2020, 14:38 GMT+10

AYAW GYUD OG KOMPYANSA. Sa nagsingabut nga pasko, daghan ang manguli nga mang-ikyas sa mga quarantine facility nga inosente sa ila na nga mahimong pagpanakod samtang may gikauban silang mga wala makagawas sa Bohol. Unta, makasabut sila nga kini alang sa ato usab nga katuyu-an. (rahchiu/PIA-7/Bohol)

TAGBILARAN CITY, Bohol, Nov 26 (PIA) - Dili tanan nga naghatag sa negatibo nga resulta sa swab test nagpasabut nga luwas na ang usa ka tawo sa kagaw sa Corona virus disease (COVID).

Kini maoy gipasabut sa mga tinugyanan sa World Health Organization (WHO), kinsa usab mipasabut nga importante usab nga mahibaw-an kon kanus-a ang katapusang pagkasagol sa pasyente sa usa ka kompirmado nga kaso sa COVID-19.

Sa COVID 19 incubation timeline nga gipakita sa WHO pinaagi sa usa ka infographics, gipahibaw nga ang average nga panahon nga ang COVID mopuyo sa lawas apan dili pa magpakita sa iyang ka mangtas, adunay lima ngadto sa unom ka adlaw pa, hangtud sa 14 ka adlaw.

Kini nga kasayuran karon maoy basehanan ug kapasikaran ngano nga pugos nga 14 ka adlaw ang gipangayon alang sa kwarantina sa usa ka tawo, aron makit-an kon makapakita ba ang kagaw sa iyang presensya pinaagi sa mga simptomas sa sulod sa 14 ka adlaw.

"Ang negatibo nga swab test result, wala magpasabut dayun nga luwas ka na sa kagaw. Kinahanglang atong makonsiderar ang saktong 'timing' sa pagpatesting sa pasyente gikan sa iyang katapusan nga adlaw sa pagkasagol ug pagkaduol sa usa ka tawo nga kompirmado nga may COVID-19.

Pananglitan, sa adlaw nga ang usa ka tawo naexpose sa usa ka kompirmado nga nagpositibo sa COVID, bisan kon nagpatesting kini pinaagi sa pagpakuha'g swab sample sa ika lima ka adlaw, mahimo pa kini nga magnegatibo, segun sa infographics sa WHO.

Pipila ka adlaw human siya masaligon nga luwas sa kagaw kay nagnegatibo sa test results, sa iyang paggawas aron moadto sa mga lugar nga may daghang tawo, sama sa pagtambong sa kalihokan, party ug uban pa, mahimo nga manakod na siya kay ang COVID magsugod nag panakod duha ka adlaw sa sili pa manggawas ang mga timailhan sa sakit, pasabut sa WHO.

Niini, mahimo nga sa ika napulo pa ka adlaw human siya katapusang nasagol sa nagpositibo sa kagaw manggawas ang iyang mga simtomas, ug daghan na nga mga tawo ang iyang natakdan.

Tungod niini, mirekomendar ang WHO ngadto sa mga nahimong nakaduol niadtong mga nakompirmar nga may COVID sa paghuman gayud sa 14 ka adlaw nga kwarantina, bisan pa kon magpatesting ug magnegatibo sa COVID pinaagi sa Reverse Transcription Polymerase Chain Reaction test.

Niini nga pahibaw, gilangkob usab sa pagpahimangno sa WHO nga nagkadaku ang posibilidad nga modaghan ang kaso sa COVID sa panahon sa Pasko.

Kini tungod sa mga posibilidad sa pagpanggawas sa mga tawo aron mamalit og pinaskohan.

Nunot niini, aghat sa WHO, atong himoon nga katuyuan nga mamahimong luwas ang atong Pasko pinaagi sa pagsunod sa mga health and safety protocols.

"Mahimo pa gihapon nato nga saulogon ang Pasko kauban sa atong mga mahal sa kinabuhi samtang dili nato ipangsalikway ang mga pagpanalipod, aron atong katabangan nga bugtoon na ang pagpanakod-takod," segun pa sa WHO. (rahchiu/PIA-7/Bohol)

More United Kingdom News

Access More

Sign up for United Kingdom News

a daily newsletter full of things to discuss over drinks.and the great thing is that it's on the house!